INSPETÓR JERAL AIFAESA.I.P.,NO EKIPA HALA’O SORUMUTU HO ADMINISTRADÓR MUNISÍPIU AILEU BA SERVISU DESKONSENTRADU

Aileu, 20/07/2021 - Ekipa husi Autoridadade Inspesaun no Fiskalizasaun ba AtividAde Ekonómika Sanitária Alimentar, Lideradu husi Inspetór Jeral Dr. Ernesto Monteiro, M.T., no akompaña husi Diretór Jurídiku Dr. Domingos Nunes, Tékniku ba Apoiu Gabinete Sr. Armando Alves no Xefe Seksaun Rekursu Umanu Sra. Estefánia Atáide, hala’o sorumutu ho Administradór Munisipiu Aileu Sr. Abel da Conçeição, iha Salaun Enkontru Munisipál Aileu.

Objetivu Prinsipal husi hasoru malu ne’e, ko’alia kona-ba preparasaun ba serbisu deskonsentradu tuir artigu 19, husi dekretu lei númeru 26/2016, 29 juñu ne’ebé sei implementa liu husi koordenasaun servisu ida ne’e.

Iha enkontru ne’e, Inspetór Jerál AIFAESA Dr. Ernesto Monteiro, MT., akresenta pontu importante iha papel AIFAESA nian liga ho polítika estratégia servisu deskonsentradu ba área inspesaun no fiskalizasaun, nune’e halo kontrolu bazeia ba lei. La’os atu buka Koima, maibé oinsá mak autoridade sira bele partisipa iha dezenvolvimentu ekonomia nasaun nian, relativamente munisipíu ne’e rasik.

Relasiona ho assuntu ne’e, iha abertura Administradór Munisípiu Aileu Sr. Abel da Conçeição hateten, importante dunik ba koordenasaun serbisu ida ne’e, tanba liu husi meius ne’e mak bele serbisu hamutuk hodi tau matan ba atividade negócio sira ne’ebé la’o iha munisipiu ne’e, liu-liu ba Folin Sasan.

Iha biban ne’e mós, Diretór Assuntu Jurídiku no Kontraordenasaun AIFAESA, halo aprezentasaun kona-ba Orgánika AIFAESA nian ligadu ho prosedimentu ne’ebé regula atividade ekonómika.

Entretantu, rohan husi enkontru ne’e envolve partisipasaun diskusaun husi Diretór Jestaun Merkadu no Turizmu, Diretór Komérsiu, reprezentante komando PNTL inklui entidade relevante. Enkuantu diskusaun ne’e modera husi Tékniku ba Apoiu Gabinete AIFAESA Sr. Armando Alves.

DIP/AIFAESA.