AIFAESA,I.P Hala’o Enkontru Ho OMS

Autoridade Inspesaun no Fiskalizasaun Atividade Ekonómika Sanitária no Alimentar I,P., hala’o enkontru ho Organizasaun Mundial Saúde, iha Salaun Enkontru OMS Kaikoli, (22/02/2019).
Enkontru refere hanesan enkontru kontinusaun ne’ebe AIFAESA ho OMS hala’o tiha ona, no objetivu husi enkontru ne’e, husi parte AIFAESA no OMS hakle’an kona-ba projetu dezenvolvimentu edukasaun no saúde ne’ebé apoiu husi Governu Xina ba Timor-Leste liu husi akordu ne’ebe asina ona husi Ministeriu Negosiu Estrangeiru no Kooperasaun iha 2017 liu ba.
Projetu dezenvolvimentu edukasaun no saúde ne’e, foka liu ba area nutrisaun no seguransa ai-ha. Iha ne’ebé AIFAESA hola parte importante iha area seguransa ai-han programa sira ne’ebé sei dezenvolve iha projetu ba area seguransa ai-han mak hanesan assistensia téknika ba kuadru legal iha seguransa ai-han, Dezenvolvimentu ba laboratóriu seguransa ai-han, no laboratoriu, kapasitasaun ba inspetor sira kona-ba aihan seguru no teste laboratóriu, no sosializasaun ba públiku kona-ba konteksu seguransa ai-han ka ai-han seguru.
Entidade implemetadora ba projetu refere mak ajénsia internasional sira hanesan OMS, WFP no FAO, ba dezenvolvimentu setor edukasaun no saúde iha área nutrisaun no seguransa ai-han. Entididade estadu nasional sira ne’ebé mak sei benefisia husi projetu refere mak AIFAESA,I.P, Ministériu da Saúde no ministériu relevante sira seluk.