AIFAESA, I.P., DIVULGA INFORMASAUN KONA-BA PAPEL NO INSTRUMENTU LEGAL NE'EBÉ REGULA ATIVIDADE EKONÓMIKU IHA TIMOR-LESTE

Bobonaro, 27/08/2021 - Autoridade Inspesaun no Fiskalizasaun, Atividade Ekonómika, Sanitária no Alimentár, Institutu Públiku, ne'ebe dezignadu ho naran AIFAESA, I.P. no tuteladu ba Ministru Koordenadór ba Assuntu Ekonómiku (MKAE), realiza Semináriu ho tema "Divulgasaun kona-ba Papel AIFAESA nian no Instrumentu Legál ne'ebé regula atividade ekonómika iha Timor-Leste".

Semináriu ne'ebé ho objetivu atu divulga servisu sira relasiona ho lejislasaun sira ne'ebé fó kompeténsia ba autoridade Inspetetiva AIFAESA, I.P., nu'udár baze legál ida atu regula atividade ekonómika iha nivél teritóriu Timor-Leste. Atividade ida ne'e aberta direitamente hosi reprejentante Autoridade Munisípiu Bobonaro no Postu Administrativa Balibo, atual Diretór Sentru Saúde Balibo, Manuel da kosta.

Inspetór Jerál AIFAESA, Dr. Ernesto Monteiro, M.T., apresia no urgullu ba negosiante no reprejentante instituisaun relevante sira iha Munisípiu Bobonaro espesialmente ba Postu Administrativa Balibo ne'ebé ho vontade di'ak no ho antosiaizmu tebes hodi partisipa no akopaña di'ak iha apresentasaun sira hotu ne'ebé apresenta hosi oradór sira iha semináriu ne'e.

Iha Sorin seluk Komadante Eskuadra PNTL, Trindade M. da Costa hateten, oportunidade ida ne'e persija iha aproveitamentu di'ak hosi negosiante sira tanbá bele kapasita sira, oinsa iha jestaun di'ak ba atividade negosiu nian no atu bele hadok-an hosi infrasaun ne'ebé bele hasusar negosiante sira iha atividade refere.

Elen Miramaya, hanesan Negosiante hosi batugade, husu ba AIFAESA atu atividade ida ne'e iha kontnuasaun ba postu sira hotu inklui suku no aldeia sira atu bele haklean di'ak liu tan informasaun sira kona-ba regulamentu sira ne'ebé regulariza atividade ekonomika ne'e rasik, nune'e mós negosiante sira agradese ba AIFAESA tanbá bele hafanun sira hosi nakukun nian hodi hetan naroman ba informasaun kona-ba oinsa bele garante kualidade no seguru iha atividade negosiu nian.

Entretantu Oradór ba atividade ne'e maka, Diretór DAJC, Domingós Nunes ne'ebé aprezenta kona-ba Papel AIFAESA no instrumentu legál sira ne'ebe regulariza atividade Ekonómiku iha Timor-Leste, Diretór DO, Gabriel da Costa, Apresenta kona-ba prosedimentu atividade Inspesaun no Fisklaizasaun, Diretór DMP, José M. dos Reis Amaral, apresenta kona-ba sasukat no padraun tuir regulamentu no progresu servisu, Diretóra DPORAL, Floriana Azete Pinto, apresenta kona-ba Planu Operasionál, Risku Ai-Han no analíza Labóratoriu nomós Diretóra DNCI-MTCI, Natalia M. A. da Costa, ne'ebé modera hosi Xefe Divizaun Jurídiku, Andreas M. Cabral.

DIP/AIFAESA.