AIFAESA HALA'O SEMINÁRIU HO TEMA "DIVULGASAUN KONA-BÁ PAPEL AIFAESA., NO INSTRUMENTU LEGAL NE'EBÉ REGULA ATIVIDADE EKONÓMIKU IHA TIMOR - LESTE"

Liquiça, 23/08/2021 - Autoridade Inspesaun no Fiskalizasaun ba Atividade Ekonómika Sanitária no Alimentar, AIFAESA, I.P, liu husi Departamentu Assuntu Jurídiku Kontraordenasaun, hala'o semináriu, hodi divulga informasaun kona-bá lejislasaun sira ne'ebé regula atividade ekonómika, hanesan lisensiamentu, kontrolu ba ai-han, kuantidade no kualidade ba sasan falun fali, iha Munisípiu Liquiça.

Inspetór Jeral AIFAESA Dr. Ernesto Monteiro, M.T., hateten dezenvolvimentu ne'e laos estadu ou governu deit mak halo maibé dezenvolvimentu ne'e entre populasaun tomak liu-liu emprezariu, setór privadu no governu sei halo dezenvolvimentu ba ita nian rain. Ho ida ne'e obrigasaun ba ami atu fahe informasaun ba ita bo'ot sira. Husu ba negosiante sira atu kumpri lei ne'ebé iha, se la kumpri maka sei hetan sansaun.

Nune'e iha abertura, Administradór Munisípiu Liquiça Sr. Pedro Paulo Gomes, husu ba negosiante sira iha Liquiça fa'an sasan, fornese ho diak atu nune'e ema bele konsumi ho diak ba ema nia saúde.

Entretantu oradores ba semináriu ne'e husi AIFAESA ne'ebé kompostu husi Diretór Departamentu Operasaun Gabriel da Costa, Diretór Departamentu Metrolójia no Padronizasaun José Reis Amaral, Diretóra Departamentu Planeamentu Operasional Risku Alimentar no Laboratóriu Floriana Azete Pinto, Xefé Divizaun Jurídiku Andreas Cabral no modera husi Dr. Domingos Nunes, materia mak hanesan dekretu lei nú. 26/2016, prosedimentu inspesaun no fiskalizasaun iha terenu, progressu servisu Departamentu Metrolójia no Padronizasaun, progressu servisu Departamentu Planu Operasional Risku Alimentar no Laboratóriu.

Orador seluk mai husi SERVE, Diretór Executivu Florencio Sanches, aprezenta materia kona-bá prosedimentu rejistu atividade komersial no oradora husi MTCI Diretóra Regulasaun Komersial Manuela Tilman aprezenta materia prosedimentu servisu diresaun jeral komersiu.

DIP/AIFAESA